المسحراتي11| أشعار فؤاد حداد.. النوبة يا أسمر

المسحراتي11| أشعار فؤاد حداد.. النوبة يا أسمر اصحى يا نايم - تصوير: سمر شومان
كتب – فؤاد حداد
تصوير – سمر شومان

المسحراتي11

11- النوبة يا أسمر
اصحى يا نايم
وحّد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحّد الرزاق
رمضان كريم
مســحـراتى وجيت مقبل يوم
مـنـقـراتى ع النخيل والدوم
اللى شرق بين الغرق والعوم
يا سد عالى وقال خيالى فداك
آه يا دلال البحر لما انفجر
آه يا مبانى من القلوب والحجر
آه يا شجر إنسان وإنسان شجر
تتمنى أرض وأرض تتمناك
النوبه يا اسمر يا نبات النور
شمس وقمر وجنينه من غير سور
وضفيره بتلف الزمن وتدور
وتطل ع الوادى من الشباك
مرزوقه رايحه وجايه مطمنه
وتغنى غنوه غريبه وحنينه
ع العنجريب غمضت عينى هنا
ع العنجريب فتحت عينى هناك
القلب لما جت سليمه سليم
كوم اومبو كوم اومبو وبلح ابريم
بلحنا والسنه فى شهرٍ كريم
ما ألطفك يا ليل وما أحلاك
المشى طاب لى
والدق على طبلى
ناس كانوا قبلى

قالوا فى الأمثال:
“الرجل تدب مطرح ماتحب”
* * *
وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال:
قفص القمر نوبى متعشق بخوص وجريد
والنيل فى صدرى يقول لى جريت واقوله جريت
جريت على عيشى بين الفرن والشباك
وشفت مرزوقه يا مرزوقة بتستناك
ويا سامر الحى كان عامر بشر وملاك
ونزلت فى البحر كان الصبر مطلوبى
غنيت بموال ولاد النيل وغنوا بى
زى الشمندوره باتقلب على جنوبى
قفص القمر نوبى متعشق بخوص وجريد
اصـحى يانايم
وحّد الدايم
السعىُ للصوم
خيرٌ من النوم
دى ليالى سمحه
نجومها سبحه
اصـحى يانايم
يانايم اصحى
وحّد الرزاق

المسحراتي10| أشعار فؤاد حداد.. صاحب حسن ونعيمة

المسحراتي9| أشعار فؤاد حداد.. وردة ما بتدبلش

المسحراتي8| أشعار فؤاد حداد.. السيد البدوي

المسحراتي7| أشعار فؤاد حداد.. صورة تعدل صورة

المسحراتي6| أشعار فؤاد حداد.. كوبري إمبابة

المسحراتي5| أشعار فؤاد حداد.. يوم العمل يوم عيد

المسحراتي 4| أشعار فؤاد حداد.. تونس الخضرا

المسحراتي3| أشعار فؤاد حداد.. تعرفني من صوتي

المسحراتي2| أشعار فؤاد حداد.. الحق واجب

المسحراتي 1| أشعار فؤاد حداد.. تاج المدينة أبوزيد هلال

الوسوم