المسحراتي 33| أشعار فؤاد حداد.. العبد الشاكر

المسحراتي 33| أشعار فؤاد حداد.. العبد الشاكر تصوير: سمر شومان

كتب – فؤاد حداد

تصوير – سمر شومان

العبد الشاكر

اصحى يا نايم

وحّد الدايم

وقول نويت

بكره ان حييت

الشهر صايم

والفجر قايم

اصحى يا نايم

وحّد الرزاق

رمضان كريم

مســحـراتى
مـنـقـراتى
يقبل صلاتى
إله رحيم
لا تقولوا شاعر
ولا مغنى
تقولوا عنى
كان عبد شاكر
قلبه سليم
لا صوته يعلى
على اليتيم
ولا عمره ينسى
ولا يناجى
مع اللئيم
وكان يجدد
وكان صميم
حفظ الحماسه
جاور تميم
باسم العروبه
حبال طروبه

ناديت على الدنيا والصدى

جاوبنى من آخر المدى

يا شوقى للكل

ريحة الفل

فى الندى

فى كل طيب
إنسان أغيب
عقلى واهيم
وامشى الليالى
رمضان كريم

عارف تراب الوطن نعيم

المشى طاب لى

والدق على طبلى

ناس كانوا قبلى

قالوا فى الأمثال:

“الرجل تدب مطرح ماتحب”

* * *

وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى

حته من كبدى

حته من موال:

يا أمهات هننوا ويا بنايين غنوا
المؤمنين بالرغيف والماء يتهنوا
ولا يتولد طفل إلا يلتقى الأحضان
وريحه من رمضان وإيدين تشيل عنه

اصـحى يانايم

وحّد الدايم

السعىُ للصوم

خيرٌ من النوم

دى ليالى سمحه

نجومها سبحه

اصـحى يانايم

يانايم اصحى

وحّد الرزاق

الوسوم