خمسة سياحة في أسوان.. هدوء وجمال و”راحة بال”

خمسة سياحة في أسوان.. هدوء وجمال و”راحة بال”

تصوير: أحمد دريم

الهدوء وراحة البال والناس الطيبة يعني أسوان، أفضل مكان تروحه في أي وقت لو محتاج تريح أعصابك وتستمتع بالطبيعة الخلابة وفي نفس الوقت تزور أماكن سياحية، وفي نفس الوقت برضه تعمل أحلى شوبينج، بس شوبينج أسواني من نوع خاص.

 

بس خد بالك من جو أسوان في الصيف بيكون حر جدًا، لكن دا ما يمنعش إن الجو بالليل بيكون تحفة تحفة، وعموما جو أسوان بداية من شهر نوفمبر لحد مارس بيكون حلو، ومن شهر 4 يبدأ الجو يكون حر، وفي الصيف تجنب أشعة الشمس.

تروح إزاي

أسوان تبعد عن القاهرة مسافة 982 كم، وعندك اكتر من بديل لقطار، قيمة التذكرة من القاهرة لأسوان تبدأ من 67 جنيهًا لو هاتركب قطر درجة ثانية مكيفة إسباني، وتصل لـ 135 لو هاتركب قطر درجة أولى، أما قطارات VIP فسعر التذكرة 140 جنيهًا للدرجة الثانية و244 جنيهًا للدرجة الأولى.

ودي بقى مواعيد القطارات
رقم القطار نوع القطار القيام الوصول
1902 اسباني مكيف 12:05 ص 1:05 م
980 خدمة خاصة 8 ص 10م
2012 خدمة خاصة 10 ص 11:05 م
982 اسباني  مكيف 12 م 2:05 ص
2006 خدمة خاصة 5:40 م 6:45 ص
988 اسباني مكيف 7 م 8 ص
88 خدمة خاصة 8 م 10:15 ص
996 اسباني مكيف 10 م 11:20 ص
2008 خدمة خاصة 11:05 م 12 م

أما قطار النوم من القاهرة لأسوان فتذكرته سعرها 300 جنيها للعادي و 325 للسياحي.

ومواعيدها كالتالي

قطار 84 نوم  يتحرك الساعة 8 مساء من الجيزة، والثاني قطار رقم 86 يتحرك الساعة 8:15 من القاهرة.

لو عايز تنجز وتوصل بسرعة، يبقى افضل حل هو الطيران طبعًا، ومواعيد رحلات الطيران من القاهرة إلى أسوان كالتالي

رقم الرحلة القاهرة اسوان
Ms001 5 ص 6:25 ص
Ms205 7:25 ص
Ms417 9:25 ص
Ms 463 12:05 م 13:30
Ms483 16:40 18:05
Ms 090 22:15 23:40

سعر التذكرة يبدأ من 600 جنيه، ويتفاوت السعر حسب نوع الدرجة وتوقيت الحجز.

نصيحة على جنب

لو قدرت تزور أسوان في جروب سياحي هايكون أفضل ليك، لأنك تقدر تحصل على تخفيضات في الفنادق والمطاعم السياحية، وكمان هاتوفر عليك الانتقالات.

هاتنزل أسوان في المحطة أو المطار هاتلاقي التاكسي منتشر في كل حتة، أجرته موحدة 10 جنيه لأغلب المناطق داخل المدينة، إلا لو كانت المسافة بعيدة فدي بتبقى حسب الاتفاق.

وبالنسبة للمواصلات الداخلية  “السيرفيس” فالأجرة جنيه واحد لأي مكان، وخط سير السيرفيس بيكون قريب من معظم المزارات والمناطق الأثرية.

هاتبات فين

فنادق أسوان كتير جدًا، ودا لأنها مدينة سياحية، بس أرشحلك تجرب البيوت النوبية، ودي بتكون في قرية اسمها غرب سهيل بينها وبين المدينة تقريبا ربع ساعة بالعربية، وهناك هاتلاقي فنادق تبدأ بـ100 جنيه للغرفة المزدوجة لحد 3 آلاف جنيه.

طبعا وسط البيوت النوبية لازم تجرب تعيش في فندق “أناكاتو” ودا مبني على الطراز النوبي أسعاره 550 جنيه للغرفة المزدوجة و450 جنيه للغرفة المفردة، و600 جنيه للغرفة الثلاثية.

لو عايز مثلا فندق خمس نجوم كويس نرشح لك فندق فيلة ودا يبدأ من 1500، عندك كمان ‪نوبيان هوليداي هاوس ودا الغرفة بـ600، ودا لو عايز تعيش في جو هادي وهاتلاحظ البساطة في الغرف بس الخدمة ممتازة، عايز أسعار أقل عندك كمان فندق نوبيان أواسيس ودا  أسعاره تبدأ من 280 جنيه.

كمان عندك فنادق تاني زي بسمة ومرحبا وسارة، إيجار الليلة الواحدة ما بين 400 إلى 600 للغرفة المفردة، وما بين 500 إلى 700 جنيه للغرفة المزدوجة.

الأكل

السمك أحلى حاجة في أسوان،وهاتلاقي مطاعم السمك منتشرة في كل حتة، الميزة فيها إن السمك بيكون طازة.

لو من الناس اللي بتحب الفسيخ يبقى انت محتاج تنزل ناحية بحيرة ناصر،  ودا أفضل الأماكن اللي تشتري منه فسيخ.

وعشان الفول والطعية دا أساسي في حياة كل مصري، هانرشحلك مطعم “الشاويش” أسعاره كويسة وأكله نضيف.

لكن أشهر المطاعم في أسوان مطعم مكة والمدينة المنورة والمصري وبوتو سونو جنب موقف الأقاليم والدوكة في وسط نهر النيل، متوسط أسعارهم 75 جنيه، طبعا بتزيد وتقل حسب نوعية الوجبة سواء كانت لحوم أو فراخ أو أسماك.

تزور إيه في أسوان؟ إزاي تسأل السؤال دا، دا مفيش حتة في أسوان مينفعش متروحهاش ومبدئيًا كدا أوعى تنسى تتمشى على الكورنيش بالليل، متخافش الجو مش سقعة زي القاهرة.

ندخل بقى في الجد  بص يا سيدي أي تاكسي واطلع على “غرب سهيل” مسافة مش بعيدة تقريبا 20 دقيقة بالتاكسي من المدينة، وعدي بالفلوكة الناحية التانية هاتدي صاحب الفلوكة 2 جنيه أجرته، اوعى تستغرب لو سمعت صوت أغاني نوبية من بعيد، أو لو شفت مية النيل زرقا وصافية.. أيوة والمصحف دا النيل بس مش ملوّث، هناك بيطبقوا السياحة البيئية.

اقرا أكتر عن الموضوع دا: http://bit.ly/2ohNPPi

وممكن تستأجر فندق هناك، مش هتندم.

عندك كمان جزيرة النباتات، ودي فيها أندر أنواع النباتات والأشجار، وممكن تروح جزيرة “الفنتين”، طبعا الناس هناك شايفين إن اسمها صعب فسموها “جزيرة أسوان”.

اعرف أكتر عن جزيرة النباتات من هنا:  http://bit.ly/2dststA  

ودول ممكن تروحهم عن طريق أي مركب من الكورنيش هاياخد منك 5 جنيه، وممكن تتفق معاه ذهاب وإياب، بس هاتتفق معاه على المبلغ.

كمان لازم تزور محمية سالوجا وغزال ودي تبعد 3 كم شمال خزان أسوان، بس هاتحتاج تصريح من إدارة المحميات الطبيعية، والزيارة بتكون مجانية، لكن هاتحتاج تتفق مع أي مركب نيلي من على الكورنيش، والتكلفة من 80 إلى 100.

الجو دا محتاج شوية رومانسية صح؟

فاهمينك عشان كدا نرشحلك تزور ضريح الأغا خان في الضفة الغربية لنهر النيل، وهناك هاتعرف قصة الحب بين زعيم الطائفة الاسماعيلية الأغاخان وبين زوجته  البيجوم أم حبيبة، التي كانت تحرص على وضع وردة حمراء علي قبره لسنوات طويلة بعد وفاته لحد ما اتوفت.

3 عصافير بحجر واحد

الأماكن السياحية في أسوان كتير عشان كدا انت محتاج مبدئيًا تضرب 3 عصافير بحجر

خطتك تبدأ من السد العالي، ودا يبعد حوالي 6 كم فقط عن خزان أسوان اللي أنشئ عام 1902، واللي لازم تزوره هو كمان، عشان تشوف بحيرة ناصر بالمرة، أكبر بحيرة صناعية في العالم، وكدا تبقى ضربت 3 عصافير بحجر واحد يا معلم، وعشان تقوم بالرحلة دي محتاج تتفق مع عربية “بيجو” هاتكلفك من 100 إلى 150 جنيه.

معبد فيلة

كمان لازم تحط في برنامجك إنك تزور معبد فيلة، ودا في جنوب المدينة على بعد 8 كيلو بس، أي تاكسي هايكون عارف المكان بس لما توصل هاتحتاج تاخد مركب عشان توصل المعبد اللي في وسط النيل، هاتكلفك من 75 إلى 100 جنيه، المركب بتشيل 8 أفراد يعني ممكن تتفق مع ناس زيك كدا وتأجروا المركب، وتذكرة الدخول 10 جنيه.

ومتنساش تستمتع بعروض الصوت والضوء في المعبد اللي بتكون بالليل، في نفس المكان ممكن تزور مئذنة بلال أمام معبد فيله تقدر تروحها بالاتفاق مع المراكبي.

أما لو عايز تروح معبد أبوسمبل فحاول تظبط مع شركة سياحة لأن المسافة بعيدة، 280 كم من أسوان.

متحف النوبة

متحف النوبة يعني 3 آلاف قطعة أثرية، يعني آثار نوبية جنب آثار فرعونية جنب تماثيل شمع جنب مومياوات، تشكيلة كدا بتحكي تاريخ البلد دي.

دير الأنبا سمعان

من الحاجات اللي لازم تزورها في الضفة الغربية هي دير الأنبا سمعان، اللي تأسس في القرن السابع الميلادي، ويوجد به رسومات جدارية، ويعتبر من أكبر الأديرة في مصر، ودا موجود في البر الغربي للنيل، تقدر توصله بمركب شراعي او عن طريق سيارة بالبر الغربي، سعر تذكرة الدخول 10 جنيه.

المقابر الفاطمية

من الحاجات اللي لازم توورها في أسوان المقابر الفاطمية، تاريخها يرجع إلى القرن الخامس الهجري، مكانها وسط المدينة، وهي مفتوحة للزيارة، مكانها قريب من شارع السادات اللي يعتبر أحد الشوارع الرئيسية بمدينة اسوان .

آخر حاجة لازم تعملها في أسوان هي انك تعدي على السوق السياحي، عشان تشتري أعشاب ومشروبات من أسوان زي الكركاديه والتمر هندي والعرقسوس والحنا والعراديب وغيرها كتير من الحاجات اللي بتميز أسوان.

تتطلب عرض الشرائح هذه للجافا سكريبت.

الوسوم