المسحراتي- فؤاد حداد (23)

المسحراتي- فؤاد حداد (23)

كتبت القصائد من صاحب ندا إلى مع السلامه فى رمضان 1388
نوفمبر 1968

الأمل شباب
ِ

اصحى يا نايم
وحّد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحّد الرزاق
رمضان كريم

مســحـراتى وقلبى داب
مـنـقـراتى على ألف باب
سبحت للملك والرحاب
وحلفت بالأمه والكتاب
يا مسلمين الأمل شباب
دا جرح أطيب من اللى طاب
دى شمس ما تعرف الغياب
دى ريحة الجنه والحساب
أنا الذى ارتجى الثواب
هدانى ربى إلى الصواب
أطلع من المر والعذاب
زى الشهيد أبيض الثياب
يا شفتين باسوا فى التراب
يا نخلتين راحة المصاب
واحة المآب
يا مدنتين نوروا السحاب
يا والدين الدعا مجاب
والمشى طاب لى

والدق على طبلى
ناس كانوا قبلى
قالوا فى الأمثال:
“الرجل تدب مطرح ماتحب”

* * *
وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال:

ماتت على الجسر تتلفت لأيامها
وسألت الأم لقمة عيش لايتامها
اسهر تبارك على الكفر اللى أعدمها
ما تنامش إلا شهيد ما دمت يا مسلم
آمنت بالله وجنه تحت أقدامها

اصـحى يانايم
وحّد الدايم

السعىُ للصوم
خيرٌ من النوم

دى ليالى سمحه
نجومها سبحه

اصـحى يانايم
يانايم اصحى
وحّد الرزاق

الوسوم