المسحراتي – فؤاد حداد (20)

المسحراتي – فؤاد حداد (20) تصوير - أحمد دريم

القصائد من صاحب ندا إلى مع السلامة في رمضان 1388
نوفمبر 1968

رادار ..
ِ

اصحى يا نايم
وحّد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحّد الرزاق
رمضان كريم
مســحـراتى
مـنـقـراتى
أنا عينى صاحيه
فى كل ناحيه
عن كل دار
وأنا قلبى دار
زى الرادار

لقيت على الشاشه ارتعاشه
إيدين تهوش
وصوت يوشوش
وطلقه تمشى
ان ما صابتشى
لازم حتروش
كفايه تدوش
بشويش تشوّش
وترمى نار
وأنا قلبى دار
زى الرادار

لقيت على الشاشه ارتعاشه
واد عينه ساهيه
بيقول لى سيبك
يا عم سيبك
لا أنا تور فى ساقيه
ولا يناسبنى
أبداً أسيبنى
واروح فى داهيه
داهيه تصيبك
مافيش هزار
أنا قلبى دار
زى الردار

لقيت على الشاشه ارتعاشه
قوم فز واسمع
صوت البروجى
بيقول لك اجمع
للدم تار
فى كل ناحيه
عن كل دار
عيونه صاحيه
زى الرادار

المشى طاب لى

والدق على طبلى
ناس كانوا قبلى
قالوا فى الأمثال:
“الرجل تدب مطرح ماتحب”

* * *
وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال:

بقوة الفلاحين وبقوة العمال
وبقوة الدم سايل والعرق سيّال
احنا العرب شهداء عدد الحصى ورمال
جبيننا مرفوع ولك ولكن صلبنا عتّال
قادرين على الحق ما يقدر علينا ضلال

اصـحى يانايم
وحّد الدايم

الوسوم